Ana səhifə Gündəm |
Bu gecə cəbhədə baş vermiş atışmada şəhid olmuş əsgərlərimizin dəfnində məmurlardan kimlərin iştirak etməsini araşdırdıq.
Masallı Rayon İcra Hakimiyyətinin baş məsləhətçisi İntiqam Bağırov Axar.az-a bildirdi ki, əsgər Əli Rəhimovun dəfnində icra başçısının 1-ci müavini Nadir Abıyev başda olmaqla bütün kollektiv, rayonun bütün idarə və müəssisələrinin əməkdaşları, ziyalılar iştirak edib. İcra başçısı Rafil Hüseynov isə iyulun 27-dən məzuniyyətdədir və ölkə ərazisində deyil.
Xaçmaz Rayon İcra Hakimiyyətindən bu barədə dəqiq məlumata malik olmadıqları deyildi.
Salyan Rayon İcra Hakimiyyətinin ictimai-siyasi və humanitar şöbəsinin müdiri Rəşad Cəbrayılov isə bildirdi ki, hazırda o, şəhid Səftər Məmmədovun dəfn mərasimindədir. Şöbə müdiri icra başçısı Tahir Kərimovun məzuniyyətdə olduğunu və bu səbəbdən də dəfn mərasimində iştirak etmədiyini dedi:
"Amma birinci müavin Etibar Hüseynov başda olmaqla İcra Hakimiyyətinin bütün kollektivi, eyni zamanda, bütün dövlət strukturlarının əməkdaşları şəhid əsgərlə vida mərasimində iştirak edirlər".
Ağdam Rayon İcra Hakimiyyəti başçısının müavini Zülfi Qasımov şəhid Eldar Əhmədovun səhər saatlarında dəfn edildiyini, mərasimdə icra başçısı Raqub Məmmədov da daxil olmaqla bütün kollektivin iştirak etdiyini dedi.
Digər rayonların icra hakimiyyətləri ilə əlaqə yaratmaq mümkün olmadı. Telefonlar susdu.
Tarix
2014.08.01 / 18:37
|
Müəllif
Elnur Məmmədov
|